內外夾擊流感絕跡| likemagazine.com.hk
Beauty & Health

內外夾擊流感絕跡

踏入秋季,是時候部署應付流感,雖然冬季流感高峰在1至4月,但預防勝於治療,治未病總好過病倒才求診。衞生防護中心已推出冬季流感疫苗,不過疫苗非萬能,亦未必人人適合。要防治流感,最重要是注意日常衞生同增強體質,養成良好習慣,從內與外兩方面入手,保養身體,打好個底。

 

外篇

仮面一Cool
流感主要靠飛沫傳播,所以在公眾場所,最保險係戴口罩,尤其是搭乘公共交通,好多人有病唔戴口罩不特止,重肆無忌憚唔遮唔掩大大聲咳、兜口兜面向人打噴嚏,在密閉空間想避都無得避,鬧佢又唔係,打佢更無謂;所以穩陣起見,佢唔戴,你戴!
P.S.現時口罩款式好多,有些可以洗完再用,有些可以更換內膽,而且五顏六色連公仔圖案都有得揀,用嚟襯衫都得,直情係時裝潮流一部分。因此不妨前衞啲,人未戴,你戴,cool ⋯⋯

勤洗手咪做幕後黑手
避得開直接攻擊,別忘了間接傳播。病友飛沫四圍噴,好多時會黏附在我們經常接觸的物件上,例如交通工具或大門上的扶手,又或電梯的按鈕,全都是傳播黑點,所以觸碰過後記得咪擺嘢入口。正如郭鋒大俠教落:「勤洗手,咪做幕後黑手」。就算喺街搵唔到梘液洗手,都要帶定酒精搓手!

杜絕細菌溫床
上班族最高危的地方,其實係辦公室的桌面、電話和電腦鍵盤,簡直係細菌溫床,據說重污漕過廁所!所以每日返到公司,第一件事就係用消毒濕紙巾徹底抹一抹座位附近常觸碰的地方,唔好等人幾個月至幫你抹一次,而且佢幫你抹嗰塊布⋯⋯

 

內篇

慎食補充品
有些人將補充品當補品,以為食咗就有齊人體所需元素強化機能,日日食孱仔可以變超人,東施可以變美人。殊不知亂吃等如食毒品!人體所需營養素一般在日常飲食已大致可吸收,除非經專業人士診斷話你特別缺乏某些元素需要補充,否則自已亂咁食很容易過量。咪以為食得多就勁啲,實際上大部分維他命同礦物質都不能透過身體合成,必須經由食物吸收,而且人體所需的量其實很少,吃下肚的補充品不但不易被吸收,更會屯積體內難以排走,嚴重者影響身體器官,禍害隨時大過傷風感冒。所以想吸收維他命礦物質來增強體質,未搵專家之前,還是吃天然食物新鮮蔬果最好。

動一動鬆一鬆
防護之外,最重要當然是增強抵抗力,最佳方法係做運動。無做開?唔識做?唔好諗得咁複雜,以為一定要畀錢上堂,其實每日行多幾步已經好好,得閒約朋友打下波就更好,運動之餘又可聯誼,有益身心。反而近排潮興上網睇片跟住做要小心點,有些動作教你嗰位高手輕而易舉駕輕就熟,但對你可能係十級難度,勉強跟住照做隨時受傷。所以要量力而為,否則未病先傷就無謂。

身心都要休息
運動重要,休息同樣重要。唔夠休息幾fit都無用,捱到殘重搏命做運動隨時過度透支搞到要入廠。所以工作生活要平衡,運動與休息都要平衡,成日瞓唔郁會變豬,成日郁唔瞓就變殭屍。休息除了指瞓覺,也可以嘗試讓緊張的心神安定下來,任何時候,午飯後,乘車中,只要花幾分鐘,瞌上眼睛,清空腦袋,甚麼也不去想,緩慢有致地透透氣,讓大腦徹底放鬆,每天做幾次,包保容光煥發身體好。

 

TEXT:八哥

相關文章
健康誤區慎入 人氣網店熱搶貨 豪用不肉痛 點食先唔肥?十種最易「中伏」嘅早餐 唔好阻住你老公!男士嘅避世聖地竟然係..... 點解熄燈睇電話會傷眼?後果可以好嚴重! 秋冬保濕要用油 食啱點心都能減肥!日本大熱首選瘦身點心公開 秋冬減肥秘訣! 讓你大時大節也能食住瘦