超級瓔珞 好睇唔好學| likemagazine.com.hk
Special

超級瓔珞 好睇唔好學

成日話電視已經無人睇,一套《延禧攻略》已帶來停不了的話題。除了一班後宮佳麗的花邊新聞,更有人借主角火速上位之道加以發揮,演化成職場上位秘技或成功要訣等等,一下子把魏瓔珞寫成打工仔典範,人人得而學之。固然魏瓔珞有一些特質是值得欣賞的,但有一個先決條件就是能人所不能,一眾戲迷睇得投入,認同角色往往照單全收,有樣學樣的話,隨時踩入職場地雷陣落得粉身碎骨。

超級英雄
睇漫畫英雄電影,主角通常都有通天本領兼打不死,令人好生羡慕。魏瓔珞其實同Superhero無乜分別,不止雜技刺繡手藝神乎其技,每遇難關或身陷險境,只要靜思片刻即能化險為夷絕地反擊,聰明絕頂勝過Professor-X,最重要是每次到最後都必勝。想學佢,首先要證明自己都有咁上下實力。

無限復活
在職場上,衰一次已經唔易翻身,如果成日領嘢的話,隨時即炒無得補,個CV一定花晒。但魏瓔珞衰咁多鑊都無事,又被罰入辛者庫又要去守陵又被打入冷宮,不但次次能夠翻身重更上一層樓,說到尾只係劇情需要。如果打工仔學佢以為衰咗無所謂18日後一條好漢,那麼前途就真的有你好看了!

Cool到無朋友
魏瓔珞其中一個最大特點就係cool,由初入宮認識陌生人到後來縱橫後宮無人不曉,基本上除了皇帝皇后同太后之外,任何人同佢講嘢佢幾乎都係擺出一幅cool樣,只有少數的例外。這種態度在現今講求團隊合作人際關係的職場上是大忌,cool成咁邊個願與你合作,那管你有天大本領,也不是一個人能處理所有事情。

樹敵太多
Superhero都有一個共通點—cool而且寸,魏瓔珞更是鋒芒畢露,搞到大半個後宮都與之為敵。當然她也有乖巧之時,不過只對最高權力核心賣口乖,最叻哄皇后同太后,同皇帝玩遊戲,對其他人等無論上上下下簡直目中無人,致使一個對手倒下又有另一個接住上,敵人多到應接不暇。試問咁多敵人,又點能夠專心做好工作。

有仇必報
成套劇圍繞著一個核心,就是復仇。這也是魏瓔珞為何又cool又寸的原因,她的內心充滿仇恨,覺得成個世界對佢唔住,人人不懷好意,所以對人極不友善,處理矛盾永遠用以牙還牙手段。如果在辦公室成日學佢咁時刻起曬弶,睇怕去到邊都無運行。

太多計算
試想想,若你身邊都是敵人,以致終日步步為營如履薄冰日不安心夜不安眠,時刻計算別人的一舉一動,留意著有沒有人向你下毒手,除非你有超強心理質素,否則相信很快便會神經衰弱進入思覺失調狀態,即使別人不攻擊你,你也會累垮自己。

能人所不能
睇我講到魏瓔珞好似一無是處,其實不然。佢特立獨行個性超群儆惡懲奸俠義所為大快人心。但大家要記住,佢係一個能人所不能的Superhero,你可以欣賞佢仰慕佢,但千祈唔好學佢。否則就好似細路仔睇完超人以為自己都可以飛,結果只會⋯⋯

 

TEXT:八哥

相關文章
酒月狂歡 時裝醫生為舊衣應診 美。好家居 迪士尼詭異萬聖派對 瞓唔著?咪諗嘢! 百變秋月 試味報告 睡魔急call 5招回魂 給寶寶最好的