睡魔急call 5招回魂| likemagazine.com.hk
Special

睡魔急call 5招回魂

唔夠瞓係香港人通病,晨咁早起身迫車返工,開工無耐已經烏眉瞌睡,中午飯後更加眼皮千斤墜,辦公時間睡魔急call,做錯嘢隨時畀老細照肺。要拒絕睡魔,教你5招回魂。

 

落街唞唞氣
其實瞌眼瞓其中一個主要原因係悶,大腦缺乏刺激。你行緊街就算幾都唔會瞌眼瞓,但呆座一會就已經想瞓,所以太熟習和重複性的工作好容易令人產生睡意。最直接的解決方法就係動起來,可以的話落街行個圈(既然煙民可以落街食支煙,照理唔吸煙都可以落街行個圈吧),急步或行樓梯更好,促進血液循環為大腦提供更多氧氣人都醒啲。

 

後生仔傾下偈
刺激有好多方法,自殘都係一種,不過絕對唔鼓勵,咪學蘇秦咁懸樑刺股搵個錐拮自己大髀。其實刺激大腦除咗活動身體,講嘢都好有用,睡魔來襲時不妨同隔籬位後生仔傾下偈,講笑更是驅魔靈藥,笑一笑,睡意全消。當然,首要條件係老細唔介意,甚至過嚟一齊笑就更妙。不過唔係個個老細咁open,遇著個黑面神最好忍住細細聲笑。

 

拉筋伸展深呼吸
如果你公司較保守,成日落街會畀老細趕走,唔緊要,坐在自己個位都可以周身郁。做幾下伸展運動,讓長期處於固定姿勢的身軀得到舒展,放鬆僵硬的肌肉,同樣能達到醒腦效果。伸展運動無須複雜,很簡單的拉拉手腳,轉轉腰鬆鬆頸都可以。配合深呼吸,更有助提振精神舒緩壓力。深呼吸也是以簡單為主,坐直身子,雙眼半閉(咪畀老細以為你瞓咗),用鼻孔吸氣數4下,接著屏住呼吸數3下,然後呼氣數10下;整個過程緩慢放鬆,重複做10次,包你做完雙眼炯炯有神。

 

飲水好過咖啡茶
如果又唔郁得又唔講得,咁惟有靠飲飲食食提神。飲咩?水就夠。事關人體如果唔夠水分,血糖便會升高,令人感到疲倦精神不振,所以飲杯水都可以提神。反而咖啡或茶都利尿,雖然有提神作用,但愈飲愈缺水,飲完好快又再瞌眼瞓,而且飲得多對身體無益,所以飲水最穩陣。

 

食粒黑朱古力
單飲杯水唔夠喉,當然要搵啲嘢食。可以的話食生果效果最好,生果天然新鮮有多種維他命好處不用多說,重點係又要洗又要批又要切,搞完一輪已經睡意全消。不過又係嗰句,首要公司環境容許,如果唔方便的話,揀就手的零食吧!眾多零食之中,首推黑朱古力,記住愈黑愈好,即朱古力含量要高(起碼60%以上),一來少糖少奶唔易食肥,最重要是朱古力中的可可鹼能刺激中樞神經,擴張血管,令人情緒興奮,提高記憶力;另外所含可可多酚有抗氧化作用,清除自由基,延緩衰老,防止皮膚老化,重可以改善血液循環,減低壞膽固醇,預防心血管疾病,連經痛都可以舒緩⋯⋯真係幾乎位列仙丹,閒時食一粒,眼皮都唔會耷。

 

TEXT:美斯

相關文章
酒月狂歡 時裝醫生為舊衣應診 超級瓔珞 好睇唔好學 美。好家居 迪士尼詭異萬聖派對 瞓唔著?咪諗嘢! 百變秋月 試味報告 給寶寶最好的