美食共享不私藏| likemagazine.com.hk
Shopping

美食共享不私藏

外出食飯,試到美味的,你會點做?有人密而不宣,當成私密飯堂。但獨食難飛,你的私心,隨時扼殺一間好餐廳的生存機會,尤其在香港,舖租超昂貴,你的一點分享,可能是餐廳的未來。

 

葵芳無味精靚湯飯
很多小社區都隱藏美味餐廳,正如呢間位於葵芳的小店,記者只因路過而遇上,見其大大隻字寫住「足料靚湯 絕無味精」,所以入內幫襯,試過翻尋味。小店是平民茶餐廳格局,主打是湯飯及特色粉麵,其中醉系列和鮮系列是人氣之選。醉系列即是用酒醃,如醉雞、醉豬手和醉鮮牛肉。至於鮮系列,有鮮鯇魚腩、鮮鯇魚咀、鮮鯇魚骹和鮮鯇魚片。兩個系列都可選配粉麵或泡飯,湯可選魚湯或豬骨湯,甚至加錢配鮮茄薯蓉湯底,呢類湯勁有家庭feel。

當日記者首次幫襯,穩陣起見,主要點招牌菜式,包括:胡椒酸菜豬肚雞配豬骨湯湯飯,並加點兩碟小食:醉豬手及鮑汁神掌。先講鮑汁神掌,即是鮑汁鴨掌。鴨掌煮得很軟腍,膠質滿腴,女生最like;鮑汁鹹鮮有致,味道不錯。醉豬手是精采的,爽、脆、香。泡飯呢,湯底要讚,胡椒豬骨湯很惹味,胡椒味濃,微辣刺激,醒胃回味;豬肚煮得剛好,爽口的,而且沒有腥羶味;雞件味道不錯,雞有雞味;讚的是非常足料,細食女生可能未必能獨個吞下一碗。點餐可加錢配特飲,記者要了一杯香檸薏米蜜,有熱有凍選擇。飲品是自家製作,有誠意。杯內薏米量多,加添嚼頭,檸味清香,夏天消暑。街坊價,套餐約五、六十蚊,小食每碟約廿蚊,幫襯晚飯不但超值,而且食得滿足。

INFO
醉鮮靚湯特色粉麵 
地址:葵芳禮芳街17號葵福大廈側
電話:3998 3211

 

荃灣素食車仔麵
呢間隱藏在荃灣被稱為「米線街」兆和街的素食車仔麵檔,在素食界頗有人氣。老闆Max本身不是素食者,坦言開檔起初因有生意,但做落見多咗,自己都慢慢多食素少食肉。小店位於巷仔,店內座位不多,記者當日過了午飯時間都要等位。

車仔麵有6款湯底選擇,清湯以外,還有沙嗲汁、牛腩汁、麻辣汁等,款款惹味,打破素食等於淡而無味印象。餸菜除常見的冬菇、豆卜、時菜、金菇、蘿蔔等外,還有叉燒、魚蛋、牛丸、牛腩、芝士腸等,當然所有「肉食」都是素啦!記者本來想點出名的肉骨茶,可惜售馨,改點喇沙汁,一樣正。湯底香味十足,大量薑蓉添美味。麵棄選常配的油麵或摻摻(即油麵加米粉),選了公仔麵,一樣夾得來。餸菜中,最感意外是午餐肉,口感和味道跟肉食版差不多,必點!另外點了兩個小食:番茄酸齋和粟米汁煎釀豆腐,都是值得讚。平時食的酸齋,化工味濃,橙紅色是食用色素,但呢個是自家煮番茄汁,鮮茄香甜微酸,天然風味。豆腐釀入的是仿肉混雜菜,唔話你知係素未必食得出。栗米汁用「地捫」罐頭湯開出來,質感濃稠,不是茶餐廳勁加水再加重獻汁。同行朋友點撈麵,大大碗,細食女生請講聲「少麵」,不要浪費。餸菜點了牛腩、芝士腸、響鈴,牛腩幾特別,唯肖唯妙。3餸車仔麵$40 / 撈麵$45,加餸每款$8,跟餐熱飲加$8,凍飲加$10,唔算貴,值得支持。

INFO
素悅軒
地址:荃灣兆和街25號海晴軒15號舖
電話:3486 4428

 

北角酒店驚喜午市半自助餐
香港人勁愛自助餐,永遠覺得任食等於抵食,其實認真計數未必,因為要睇咩價位和食物質素。今次介紹呢個午市半自助餐,單睇面價未必覺抵,但試過就知值回票價。

半自助餐,每位點一個主菜,頭盤和甜品任食。推介呢間酒店餐廳,因為任食的食物,沒有「揸流灘」,甚至超出期望。首先,最吸睛係有蠔食,除Irish和Fine de Clair,還有美國生蠔,蠔迷多食幾隻,已經返本一半。餐湯又是誠意作,到訪當日是番茄濃湯,非常稠,茄味濃,好味得飲完要再添。麵包,咪以為係點綴,一樣出色,款式多,法包、竹炭包、香草包、農夫包、果仁合桃包,應有盡有。沙律是即撈的,食客自選材料、醬汁,專員為你即撈,夠新鮮。冷盤選擇多,亮點在嗰盤凍肉,肉腸、火腿、Parma Ham都是精選。西餐必有的芝士盤,午市自助餐來講,呢度算豐富,還備有乾果、果仁及餅乾,有誠意。甜品區,絕對絕對要留肚,賣相靚仔精緻,杯裝木糠布甸和Panna Cotta、朱古力撻、芝士餅、慕絲餅和macaron等,有選擇困難症的有難了!必試有即製窩夫,外脆內軟,加球名牌雪糕球,滋味到難形容。任食已經食到停唔到口,主菜都精采。主菜款式定期會轉,選擇多,食得出廚師巧手用心炮製。價錢方面,成人$418,小童$308。8月底前在酒店eshop預購,可享79折。偶爾豪食一餐午飯,獎賞自己吧!

順帶一提,餐廳位於酒店頂樓,隨餐免費贈送無敵維港景,靚view送飯,抵上加抵!推介呢度另一個原因是比較清靜,有別一般提供自助餐的餐廳,人山人海,食物被峰搶得亂作一團。這裡環境氣氛優美,相約親友來此聚餐,既可享各自取喜歡食物的自由,又可享受高級酒店的餐膳美食,兼有一流的服務招待。呢口價都值囉!

INFO
港島海逸君綽酒店Le 188°餐廳及酒廊
地址:香港北角油街23號
電話:2121 2693


TEXT ﹠ PHOTO:黎力勤

相關文章
冬日創意煲仔飯 遇上R,蠔季便開始了 ! 銅鑼灣高質蠔吧推介 蒜頭狂熱者必去!韓國過江龍Mad for Garlic 真。純素護膚 蒜頭狂熱者必去!韓國過江龍Mad for Garlic 旺角新鮮清湯腩小店,必試各款牛腩、煎餃! 鰂魚涌必試北海道湯咖哩 _ 日式家庭料理餐廳 剩毛復織 變可愛動物織品